La kongresejo de IJK estos KiEZ Inselparadies Petzow, situanta sur malgranda duoninsulo en la lago Glindower See, apud la vilaĝo Petzow kaj ĝia kastelparko. La tereno ampleksas ĉirkaŭ ses hektarojn da arbaro, herbejoj kaj bordo, kaj ĝi apartenas al la urbo Werder (Havel), ĉirkaŭ 12 km de Potsdamo kaj 40 km de Berlino.
KiEZ estas mallongigo de Kinder- und Jugenderholungszentrum, do ripozejo por infanoj kaj junuloj. Inselparadies funkcias ekde la fino de la 1980-aj jaroj kaj kutime gastigas lernejajn klasojn kaj junularajn grupojn, kio signifas ke ĉio sur la tereno estas farita por granda grupo kiu loĝas, manĝas kaj programas en la sama loko.
La kongresejo disponas 400 litojn en kvin loĝdomoj, en ĉambroj de du ĝis dek litoj. Por programeroj estas 18 grupĉambroj de diversaj grandecoj, la plej granda por ĉirkaŭ 50 personoj, kaj la granda salono, kiu servas samtempe kiel manĝejo kaj kiel ejo por la ĉefaj programeroj. Sur la tereno troviĝas ankaŭ subĉiela scenejo kun spaco por ĉirkaŭ 900 spektantoj.
Nia propra plaĝo
La plej granda avantaĝo de la loko estas la akvo. La kongresejo havas propran sablan plaĝon ĉe la Glindower See, kiu apartenas al la tereno kaj do estas je nia dispono dum la tuta semajno. Vi ne devos preni buson nek serĉi publikan banejon: la plaĝo troviĝas je kelkcent paŝoj de la dormĉambroj kaj de la salono.
Meze de aŭgusto la lago estas agrable varma, do inter la programeroj vi povos simple iri naĝi. Ĉe la plaĝo estas ankaŭ boatponto kaj lueblaj kajakoj.
Agrablaĵoj
Gastoj de la kongresejo povos ĝui dum la semajno diversajn agrablaĵojn por fari sian restadon pli komforta:
- Propra plaĝo ĉe la Glindower See
- Boatponto kaj luado de kajakoj
- Futbalejo, plaĝvolejbalejo, keglejo kaj grimpmuro
- Ludĉambro kun sagoludo, tablofutbalo kaj aerhokeo
- Fajrejo kaj grilejo
- Komuna vivĉambro en ĉiu etaĝo
- Duŝejoj kaj necesejoj en ĉiu etaĝo
Ĉirkaŭaĵoj
Tuj apud la kongresejo troviĝas la kastelo de Petzow kaj ĝia parko, kiun en la 19-a jarcento aranĝis Peter Joseph Lenné. De tie kondukas padoj laŭ la bordoj de la lagoj Glindower See kaj Schwielowsee, kaj promeno de ĉirkaŭ unu horo portas vin al la malnova urbocentro de Werder (Havel) kun ĝiaj fruktoĝardenoj kaj kafejoj.
Iom pli malproksime atendas Potsdamo kun siaj kasteloj kaj parkoj, kiuj apartenas al la monda heredaĵo de Unesko, kaj Berlino, atingebla ene de unu horo per trajno. Pri tio, kiel atingi la kongresejon, legu la paĝon Kiel alveni.
Dum IJK ni ĉiuj troviĝos sur la sama tereno, en apudaj konstruaĵoj inter arboj kaj akvo, kaj ni ĝuos intiman kongreson sen la bezono konstante moviĝi longajn distancojn por atingi salonojn kaj dormĉambrojn. Bonvenon!